सर्लाही, १८ साउन । सर्लाही सदरमुकाम मलंगवासहित जिल्लाभरि लामो समयदेखि परेको खडेरीका कारण आहत भएका किसानमा पछिल्ला वर्षासँगै धान रोपाइँको आशा पलाएको छ ।
गत शुक्रबारदेखि लगातार भएको वर्षाले किसानको अनुहारमा खुसी छाएको हो। शनिबार राती पर्याप्त चिस्यान हुनेगरी पानी परेपछि खेतमा चिरा परेको जमिन भिज्न थालेको छ भने अघिल्लो समयमा रोपिएको धान फेरि पलाउने अपेक्षा गरिएको छ ।
स्थानीय किसानका अनुसार, “अबचाहिँ धान रोपाइएको खेतमा यसअघि परेको चिरा पुरिएका छन्, रोपो पनि फेरिएको छ। पछिल्ला दुई दिनको वर्षाले रोपोलाई निकै राहत मिलेको छ ।”
यसअघि इनार, बोरिङ र स्यालो ट्युवबेलमार्फत पम्पसेट प्रयोग गरेर जबर्जस्ती रोपाइँ गरेका किसान अब भने प्राकृतिक वर्षाले धानको राम्रो उत्पादन हुने आशामा छन् ।
स्थानीय कृषि प्राविधिकहरूका अनुसार अझ केही दिन वर्षा निरन्तर भएमा जिल्लाभरि रोपाइँको कार्य तीव्र रूपमा अगाडि बढ्नेछ।