सर्लाही, २५ माघ । बलिउडकी भर्सटाइल अभिनेत्री आलिया भट्ट यतिबेला आफ्ना फरक-फरक प्रोजेक्टका कारण चर्चामा छिन् ।
‘अल्फा’ जस्तो एक्सन फिल्म र ‘लभ एण्ड वार’ जस्तो पिरियड ड्रामापछि अब उनी सम्बन्धमा आधारित एउटा सामाजिक ड्रामा फिल्म ‘हाउसवाइफ’ मा देखिने भएकी छन् । यो फिल्मलाई ‘दृश्यम २’ का निर्देशक अभिषेक पाठकले निर्माण गर्दैछन् ।
भेराइटी इन्डियाको रिपोर्ट अनुसार, आलियाले यस फिल्ममा शीर्ष भूमिका निभाउनेछिन् । मुख्य अभिनेताका लागि राजकुमार रावसँग कुराकानी भइरहेको छ, यद्यपि आधिकारिक घोषणा हुन भने बाँकी छ ।
यस फिल्ममा आलिया केवल अभिनेत्रीका रूपमा मात्र नभई आफ्नो कम्पनी ‘एटर्नल सनशाइन प्रोडक्सन’ मार्फत सह-निर्माताको रूपमा पनि जोडिनेछिन् । उनले अभिषेक पाठकको प्यानोरमा स्टुडियोसँग मिलेर यो प्रोजेक्ट अघि बढाउने भएकी हुन् ।
फिल्मको छायाङ्कन यसै वर्षको अगस्ट-सेप्टेम्बरदेखि सुरु हुने सम्भावना छ। निर्देशक पाठकले ‘दृश्यम ३’ को काम सकेपछि यस प्रोजेक्टलाई अघि बढाउनेछन्।
आलिया यतिबेला निकै व्यस्त छिन् । उनको पाइपलाइनमा शिव रावलको एक्सन थ्रिलर ‘अल्फा’ छ, जहाँ उनी एक महिला कमान्डिङ अफिसरको शक्तिशाली भूमिकामा देखिनेछिन् । यो फिल्म वाईआरएफ स्पाइ युनिभर्सको हिस्सा हो, जसमा बबी देओल पनि मुख्य भूमिकामा छन् ।
यसका साथै आलिया सञ्जय लीला भन्सालीको महत्त्वाकाङ्क्षी फिल्म ‘लभ एण्ड वार’ मा रणवीर कपुर र विक्की कौशलसँग देखिनेछिन् । उनी सन् २०२७ का लागि म्याडक फिल्म्सको हरर-कमेडी ‘चामुण्डा’ लगायत अन्य ठूला प्रोजेक्टका लागि पनि छलफलमा छिन् ।
पछिल्लो पटक उनलाई वासन बालाको फिल्म ‘जिग्रा’ मा देखिएको थियो ।