सर्लाही, ०६ असोज । सर्लाहीको पर्सा गाउँपालिकाका एक जना वडाध्यक्षलाई नागरिकतासम्बन्धी कसुरमा प्रहरीले नियन्त्रणमा लिएको छ ।
चार जना व्यक्तिलाई झुठो वतन तथा झुठो विवरण पेश गरी नागरिकता प्राप्त गर्न सिफारिस गरेको आरोपमा पर्सा गाउँपालिका–४, का वडाध्यक्ष सुवोध राय यादव पक्राउ पर्नुभएको हो ।
वडाध्यक्ष यादवको सिफारिसका आधारमा केही शङ्कास्पद व्यक्तिले नेपाली नागरिकताको प्रमाणपत्र लिइसकेको र केहीले लिन खोजेको प्रहरीको प्रारम्भिक अनुसन्धानमा देखिएको सर्लाही प्रहरीका सूचना अधिकारी एवम् डिएसपी सरोज राईले जानकारी दिनुभयो ।
स्रोतका अनुसार वडाध्यक्ष यादवले भारतीय नागरिकलाई नागरिकता दिलाउने कार्यमा सिफारिस गरेको खुलेको छ । प्रहरीले भने यस सम्बन्धमा थप अनुसन्धान भइरहेको बताएको छ ।
वडाध्यक्ष यादवविरुद्ध नागरिकतासम्बन्धी कसुरमा मुद्दा दर्ता गरी सर्लाही जिल्ला अदालतबाट १५ दिनको म्याद लिई अनुसन्धान भइरहेको डिएसपी राईले बताउनुभयो । ४६ वर्षीय यादव गत स्थानीय तह निर्वाचनमा लोकतान्त्रिक समाजवादी पार्टी (लोसपा) बाट वडाध्यक्षमा निर्वाचित हुनुभएको थियो ।
सर्लाहीसहित तराई मधेशका जिल्लामा जनप्रतिनिधि र कर्मचारीको मिलेमतोमा केही भारतीय नागरिकले नागरिकता प्राप्त गर्ने गरेका गुनासो बारम्बार आउने गरेको छ ।