सर्लाही, १८ बैशाख । स्वास्थ्य तथा जनसंख्या मन्त्रालयले भोलि (वैशाख १८ गते) देशभरका सरकारी अस्पतालहरूमा ओपिडी सेवा नियमित रूपमा सञ्चालन गर्न सम्बन्धित निकायलाई निर्देशन दिएको छ ।
मन्त्रालयका अनुसार सार्वजनिक बिदा परे पनि बिरामीहरूलाई स्वास्थ्य सेवामा पहुँच सहज बनाउन आवश्यक भएकोले ओपिडी सेवा अवरुद्ध नहुने व्यवस्था मिलाउन भनिएको हो ।
मन्त्रालयका सह-प्रवक्ता डा. समिरकुमार अधिकारीले जारी गरेको सूचनामा लगातार तीन दिन सार्वजनिक बिदा पर्ने अवस्थाका कारण नियमित ओपिडी सेवा प्रभावित हुने सम्भावना रहेकाले सेवाग्राहीलाई पर्न सक्ने असुविधा न्यूनीकरण गर्ने उद्देश्यले यो निर्णय गरिएको उल्लेख छ ।
स्वास्थ्य सेवा प्रवाहमा अवरोध आउन नदिन र आकस्मिक तथा नियमित उपचार सेवामा निरन्तरता सुनिश्चित गर्न अस्पताल प्रशासनहरूलाई आवश्यक व्यवस्थापन गर्न पनि मन्त्रालयले आग्रह गरेको छ ।
