काठमाण्डाैं, ०२ जेठ । अमेरिकी राष्ट्रपति डोनाल्ड ट्रम्प चीन भ्रमण सकेर फर्केलगत्तै अब रुसी राष्ट्रपति भ्लादिमिर पुटिन दुई दिने राजकीय भ्रमणका लागि मे १९ मा चीन जाने भएका छन् ।
क्रेमलिनद्वारा जारी विज्ञप्ति अनुसार, पुटिनले आफ्नो भ्रमणका क्रममा चिनियाँ राष्ट्रपति सी चिनफिङसँग अन्तर्राष्ट्रिय तथा क्षेत्रीय मुद्दाहरूमा विस्तृत छलफल गर्नेछन् ।
वार्तापछि दुवै नेताले एक संयुक्त घोषणापत्रमा हस्ताक्षर गर्ने कार्यक्रमसमेत तय गरिएको छ । यसअघि अमेरिकी राष्ट्रपति ट्रम्पले बेइजिङमा राष्ट्रपति सीसँग भेटवार्ता गरेका थिए ।
उक्त भ्रमणलाई ट्रम्पले अत्यन्त सफल भनेका छन् । त्यस्तै, चिनियाँ सरकारी सञ्चारमाध्यमका अनुसार राष्ट्रपति सीले ट्रम्पको भ्रमणलाई ऐतिहासिक र एउटा महत्त्वपूर्ण कोशेढुङ्गाको संज्ञा दिएका छन् ।
ट्रम्पको भ्रमणका क्रममा दुई देशबीच सम्बन्ध सुमधुर देखिए पनि कुनै ठूला व्यापारिक सम्झौता वा नयाँ डिलको घोषणा भने गरिएको थिएन । ट्रम्प फर्किए लगत्तै हुन लागेको पुटिनको यो भ्रमणलाई विश्व राजनीतिमा निकै चासोका साथ हेरिएको छ ।