सर्लाही, १६ असाेज । सर्लाहीको बागमती नगरपालिका–३, धरहराका वडाध्यक्ष तिलकबहादुर मोक्तानको निधन भएको छ ।
मुटु रोगबाट पीडित ४७ वर्षीय मोक्तानको शुक्रबार बिहान काठमाडौँमा निधन भएको बागमती नगरपालिकाका कार्यवाहक नगरप्रमुख कृष्णकुमार लामाले बताउनुभयो । वडाध्यक्ष मोक्तान उपचारका लागि एक महिनाअघि काठमाडौँ जानुभएको थियो ।
उहाँको आगामी असोज २२ गते शहीद गङ्गालाल राष्ट्रिय हृृदय केन्द्र बाँसबारीमा अप्रेसनको तयारी भइरहेका बेला निधन भएको हो ।
केही दिनदेखि ज्वरो आएपछि कोठामै आराम गरिरहेको अवस्थामा शुक्रबार बिहान मोक्तानको निधन भएको जानकारी प्राप्त भएको बागमती नगरपालिका–२ का वडाध्यक्ष टेकबहादुर बलले जानकारी दिनुभयो ।
२०७९ को स्थानीय तह निर्वाचनमा मोक्तान तत्कालिन नेकपा माओवादी केन्द्रबाट वडाध्यक्षमा निर्वाचित हुनुभएको थियो ।