सर्लाही, १९ जेठ। सर्लाहीमा लागूऔषध ब्राउन सुगरसहित दुई जनालाई पक्राउ गरेको छ । सर्लाही बागमती नगरपालिका–८ गाढीचोकस्थित प्रहरी टोलीले गोप्य सूचनाका आधारमा छापा मारेर उनीहरूलाई नियन्त्रणमा लिएको हो ।
पक्राउ पर्नेमा बागमती नगरपालिका–८ निवासी ३० वर्षीय अर्जुन लामा र धनुषाको धनुषाधाम नगरपालिका–७ निवासी ३० वर्षीय समन लामा रहेका छन् ।
प्रहरीले अर्जुन लामाको घरमा लुकाइछिपाइ राखिएको अवस्थामा ब्राउन सुगरजस्तो देखिने खैरो पदार्थ फेला पारेपछि दुवै जनालाई नियन्त्रणमा लिएको जनाएको छ ।
प्रहरीका अनुसार उनीहरूको साथबाट १.१० ग्राम ब्राउन सुगरजस्तो देखिने खैरो पदार्थ (प्लास्टिकसहित), तीन थान एन्ड्रोइड मोबाइल फोन, नगद २३ हजार ७७० रुपैयाँ तथा भारतीय मुद्रा ९०० रुपैयाँ बरामद गरिएको छ ।
पक्राउ परेका दुवै जनाविरुद्ध लागूऔषध मुद्दामा सर्लाही जिल्ला अदालतबाट सात दिनको म्याद थप अनुमति लिई इलाका प्रहरी कार्यालय बरहथवाबाट थप अनुसन्धान भइरहेको जिल्ला प्रहरी कार्यालय सर्लाहीले जनाएको छ ।
प्रहरीले घटनाबारे थप अनुसन्धान जारी रहेको बताएको छ ।