सर्लाही, ०१ मंसिर । सर्लाहीको धनकौलस्थित अन्नपूर्ण चिनी उद्योगमा बिक्री गरिएको उखुको भुक्तानी माग गर्दै धर्नामा बसेका किसान र उद्योगीबीच चार बुँदे सहमति भएको छ ।
जिल्ला प्रशासन कार्यालय सर्लाहीमा बसेको बहुपक्षीय छलफलपछि सहमति भएको हो ।
प्रमुख जिल्ला अधिकारी रामुराज कडरियाको अध्यक्षतामा गरिएको छलफलमा यस आर्थिक वर्षमा उखुको क्रसिङका क्रममा हुने प्रदूषण नियन्त्रणका लागि आवश्यक उपाय अपनाउने, गत वर्ष चिनीको मूल्य निर्धारणपछि बाँकी रहेको रकम किसानलाई भुक्तानी गर्ने सहमति जुटाइएको छ ।
यसबाहेक, यसअघिका उद्योगपति राकेशकुमार अग्रवालले किसानको बाँकी रकम एक महिनाभित्र भुक्तानी गर्ने र सबै पक्ष मिलेर उखु मिल सञ्चालनका लागि सहज वातावरण तयार गर्ने सहमतिमा सहमति गरिएको छ । छलफलमा उद्योगपति शैलेन्द्र गुप्ता पनि सहभागी भएका थिए ।
सहमति भएपछि किसानले तत्कालका आन्दोलन स्थगित गरेका छन् । “अब हामी बक्यौता रकम पाउने आशमा छौँ, त्यसैले अहिलेका सबै धर्ना तथा आन्दोलनका कार्यक्रम रोकेका छौँ,” अगुवा किसान रामआधार रायले बताए ।
