सर्लाही,२७ चैत्र । पर्साको तिलावे नदीमा बेलिब्रिज निर्माण थालिएको छ । ग्रामीण भेगसँग जोड्ने वीरगञ्ज महानगरपालिका र बहुदरमाई नगरपालिकाको सिमानामा रहेको तिलावेमा पुल निर्माण कार्य रोकिएको झन्डै डेढ वर्षपछि बेलिब्रिज निर्माणको काम अघि बढेको हो ।
विक्रम संवत् २०८१ को बर्सातका कारण तिलावेमा पुल निर्माण कार्य रोकिएको थियो । पुल नभएपछि सो क्षेत्रमा सवारीसाधन गुडाउन समस्या हुँदै आएको छ । नारायणी सिँचाइ व्यवस्थापन कार्यालयका प्रमुख मनोजप्रसाद पटेलले तिलाबे नदीमा रहेको पुल भत्किएको स्थानभन्दा केही तल करिब ४८ मिटर लामो बेलिब्रिज निर्माणको काम अघि बढाइएको बताए ।
“तिलाबे पुलको पिलर क्षतिग्रस्त भएसँगै गत मङ्सिर महिनामा बेलिब्रिज निर्माणका लागि ठेक्का सम्झौता भएको हो,” उनले भने, “ठेक्का सम्झौताअनुसार तिलावेमा बेलिब्रिज २०८३ वैशाख अन्तिमसम्म निर्माण सम्पन्न हुनुपर्नेछ ।”
जलस्रोत तथा सिँचाइ विभागअन्तर्गतको नारायणी सिँचाइ व्यवस्थापन कार्यालयले तिलावे नदीमा बेलिब्रिज निर्माणका लागि २०८२ मङ्सिर २९ गते रु दुई करोड ४६ लाख ६० हजारमा ठेक्का सम्झौता गरेको थियो । वीरगञ्ज महानगरदेखि ग्रामीण क्षेत्रमा जाने व्यस्त सडकमा पर्ने पुल निर्माणमा ढिलासुस्ती हुँदा यहाँका सर्वसाधारण सास्ती भोग्दै आएका छन् ।
निर्माण कम्पनी ममता इन्टरप्राइजेज एन्ड कन्स्ट्रक्सन प्रालिका इन्जिनियर मनोजकुमार मण्डलले तिलावे पुलको बेलिब्रिज निर्माणको काम ३० प्रतिशत सम्पन्न भएको बताए। तोकिएको समयमै काम सम्पन्न गर्ने उनले बताए । अहिले सो ठाउँमा डाइभर्सन गरेर अस्थायी रूपमा सवारीसाधन सञ्चालन गरिँदै आएको छ ।