सर्लाही,२७ चैत्र । आन्तरिक राजस्व विभागले मातहतका कर्मचारीका लागि नयाँ आचारसंहिता, २०८२ जारी गरेको छ। आचारसंहितामा कर्मचारीलाई करदातासँग अनधिकृत भेटघाट नगर्न, करदाताको प्रतिनिधि वा एजेन्टका रूपमा काम नगर्नसमेत भनिएको छ ।
महानिर्देशकबाट २०८२ चैत २५ गते स्वीकृत उक्त आचारसंहितामा मूल्यमान्यता, आचरण, व्यावसायिकता, तटस्थता र सेवा प्रवाहसम्बन्धी विषयहरू समेटिएको छ। साथै, निजामती सेवा ऐन तथा नियमावलीमा उल्लेखित आचरण सम्बन्धी प्रावधानलाई समेत समेटेर आचारसंहिता जारी गरिएको छ ।
आचारसंहिता अनुसार कर्मचारीहरूले इमान्दारिता, निष्पक्षता र वस्तुनिष्ठताको आधारमा काम गर्नुपर्ने, सेवाग्राहीप्रति सम्मानजनक व्यवहार गर्नुपर्ने तथा कुनै पनि प्रकारको पक्षपात वा प्रभावमा नपरी कार्यसम्पादन गर्नुपर्ने जस्ता कुराहरू भनिएको छ ।
यसैगरी, सेवाग्राहीबाट कुनै पनि प्रकारको उपहार, दान वा सुविधा लिन नपाइने, पदको दुरुपयोग गर्न नहुने, करदातासम्बन्धी गोप्य सूचना सुरक्षित राख्नुपर्ने र झुट्टा विवरण तयार गर्ने वा कर छलीमा सहयोग गर्ने कार्यलाई निषेध गरिएको पनि उल्लेख छ ।
यसैसँगै, मिति २०७४/०८/०४ मा जारी गरिएको “आन्तरिक राजस्व विभाग र अन्तर्गत कार्यालयमा कार्यरत कर्मचारीहरूको आचारसंहिता, २०७४” खारेज गरिएको छ।
पछिल्लो समय विभाग तथा मातहतका निकायबाट करदातालाई अनावश्यक दुःख दिने, अतिरिक्त शुल्क असुल्ने र सेवा प्रवाहमा ढिलासुस्ती हुने गरेको भन्दै यो निकाय आलोचित हुँदै आएको छ । ठूला करदातासँग ‘सेटिङ’ हुने विषय पनि बेला–बेला सार्वजनिक हुँदै आएका छन्।
महानिर्देशक भई जानकै लागि शक्तिकेन्द्रहरूमा ठुलै मोलमोलाइ हुने गरेको अड्डामध्ये यो पनि प्रमुख अड्डाका रूपमा परिचित छ।