सर्लाही, ९ असार । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशन अन्तर्गत हिजाे सुरु हुने भनिएको बन्दसत्र स्थगित गरिएको थियाे ।
सोमबार पार्टीको प्रतिनिधि व्यवस्थापन उपसमितिले जारी गरेको सूचना अनुसार महाधिवेशन प्रतिनिधिहरूको प्रदेशबाट प्राप्त नामावली रुजु गर्ने तथा प्रतिनिधि कार्ड प्रिन्ट गर्ने कार्यमा अपेक्षाभन्दा बढी समय लागेकाले बन्दसत्र आजका लागि स्थगित गरिएको हो ।
सूचनामा हिजाे साँझ ७ बजेदेखि प्रिन्ट भइसकेका प्रतिनिधि कार्ड वितरण सुरु गरिने तथा प्रक्रियामा रहेका कार्डहरू आज बिहान ७ बजेदेखि वितरण गरिने उल्लेख भएकाे छ । प्रतिनिधि कार्ड वितरण सम्पन्न भएपछि बन्दसत्रको कार्यक्रम सुरु गरिने जनाइएको छ ।
पार्टीले महाधिवेशन आफ्नो सर्वोच्च निकाय भएकाले प्रतिनिधि व्यवस्थापन प्रक्रियामा कुनै विवाद नआओस् भन्नेमा प्रतिबद्ध रहेको जनाएको छ ।
यसबाट महाधिवेशन प्रतिनिधि, पार्टी सदस्य तथा शुभेच्छुकहरूमा पर्न गएको असुविधाप्रति क्षमायाचना गर्दै धैर्यता, संयमता र सहयोगका लागि सम्पूर्णलाई आग्रह गरेको छ ।