काठमाडौं, ३१ असार । अर्जेन्टिनाका मुख्य प्रशिक्षक लियोनल स्कालोनीले फिफा विश्वकप २०२६ को सेमिफाइनलअघि आफ्नो टोलीको थकान वा प्रदर्शनबारे कुनै चिन्ता नभएको बताएका छन्।
इंग्ल्यान्डविरुद्ध बुधबार हुने बहुप्रतीक्षित सेमिफाइनलअघि उनले टोली फाइनल पुग्न पूर्ण रूपमा तयार रहेको बताएका हुन्।
सन् २०२२ को विश्वविजेता अर्जेन्टिनाले लगातार दोस्रो पटक विश्वकपको फाइनलमा स्थान बनाउने लक्ष्यसहित थोमस टुकेलको प्रशिक्षणमा रहेको इंग्ल्यान्डको सामना गर्दैछ।
यो खेल सन् १९८६ को ऐतिहासिक विश्वकप भेट र डिएगो म्याराडोनाको अविस्मरणीय प्रदर्शनको सम्झना दिलाउने प्रतिस्पर्धाका रूपमा पनि हेरिएको छ।
खेलअघिको पत्रकार सम्मेलनमा स्कालोनीले भने, ‘हामी राम्रो अवस्थामा छौं र यो खेलको प्रतीक्षा गर्न सकिरहेका छैनौं। यो विश्वकपको सेमिफाइनल हो र हाम्रो सपना अझै जीवित छ। फेरि एकपटक यहाँसम्म पुर्याएका खेलाडीहरूप्रति हामी अत्यन्त आभारी छौं।’
३९ वर्षीय कप्तान लियोनल मेसीको नेतृत्वमा रहेको अर्जेन्टिनाले नकआउट चरणमा निकै कठिन यात्रा तय गर्दै अन्तिम चारमा स्थान बनाएको हो।
अर्जेन्टिनाले अतिरिक्त समयमा केप भर्डलाई ३–२ ले हराएको थियो। त्यसपछि इजिप्टविरुद्ध पनि अन्तिम समयमा पुनरागमन गर्दै ३–२ को जित निकालेको थियो।
क्वाटरफाइनलमा १० खेलाडीमा सीमित स्विट्जरल्यान्डलाई पनि अतिरिक्त समयमा ३–१ ले पराजित गर्दै टोली सेमिफाइनल पुगेको थियो।
स्कालोनीले भने, ‘डेढ महिनाअघि कसैले सेमिफाइनल पुग्छौ भनेको भए म तुरुन्त स्वीकार्थें। त्यसैले हामी यहाँ कसरी आयौं भन्ने कुराले मलाई फरक पर्दैन।’
उनले थपे, ‘म आफ्ना खेलाडीहरूलाई कुनै आरोप लगाउन सक्दिनँ। हामी थाकेका छौं वा छैनौं भन्ने कुरा महत्त्वपूर्ण छैन। यो विश्वकपको सेमिफाइनल हो।’
म्याराडोनाको ‘ह्यान्ड अफ गड’ अझै सम्झनामा
इंग्ल्यान्ड र अर्जेन्टिनाबीच विश्वकपमा यसअघि पाँच पटक भेट भइसकेको छ। सबैभन्दा चर्चित खेल सन् १९८६ को क्वाटरफाइनल थियो, जहाँ डिएगो म्याराडोनाले विवादास्पद ‘ह्यान्ड अफ गड’ गोल र त्यसपछि विश्व फुटबलकै उत्कृष्ट व्यक्तिगत गोलमध्ये एक गर्दै अर्जेन्टिनालाई जित दिलाएका थिए।
स्कालोनीले भने, ‘मलाई लाग्छ सबैले त्यो खेल सम्झन्छन्। विशेषगरी डिएगोको दोस्रो गोल, जुन सधैं हाम्रो हृदयमा रहनेछ। त्यो साँच्चै अद्भुत गोल थियो। फुटबल प्रेमीहरूले त्यसलाई कहिल्यै बिर्सन सक्दैनन्, र संयोगले त्यो इंग्ल्यान्डविरुद्ध नै आएको थियो।’
सन् १९८२ को फकल्यान्ड द्वीपसमूह युद्धको इतिहासका कारण अर्जेन्टिना र इंग्ल्यान्डबीचको प्रतिस्पर्धालाई राजनीतिक दृष्टिले पनि हेरिने गरिन्छ। तर स्कालोनीले सेमिफाइनललाई केवल फुटबल खेलका रूपमा लिनुपर्ने बताएका छन्।
‘यो केवल फुटबल खेल हो। धेरै वर्षअघि भएका घटनालाई अहिलेको खेलसँग जोड्न चाहन्नँ। त्यो हाम्रो इतिहासको दुःखद अध्याय थियो, तर त्यसबारे अहिले हामी केही गर्न सक्दैनौं। अहिले हाम्रो ध्यान केवल फुटबलमा छ,’ उनले भने।
स्कालोनीले इंग्ल्यान्डका स्टार खेलाडी जुड बेलिङहम र ह्यारी केनलाई रोक्नु अर्जेन्टिनाका लागि ठूलो चुनौती हुने स्वीकार गरे। यी दुई खेलाडीले प्रतियोगितामा इंग्ल्यान्डका १३ गोलमध्ये १२ गोलमा प्रत्यक्ष योगदान दिएका छन्।
‘हामी सधैं आफूलाई कसरी सुधार्ने र विपक्षीका उत्कृष्ट खेलाडीलाई कसरी प्रभावहीन बनाउने भन्नेबारे काम गर्छौं। सम्भवतः टोलीमा केही परिवर्तन हुन सक्छ, तर उही टोलीलाई निरन्तरता दिने सम्भावना पनि छ,’ स्कालोनीले भने।
उनले थपे, ‘बेलिङहम र केन विश्वका उत्कृष्ट खेलाडीमध्ये पर्छन्। संसारका जुनसुकै प्रशिक्षकले पनि उनीहरूलाई आफ्नो टोलीमा राख्न चाहन्छन्।’