सर्लाही, ०८ भदाै । मधेस प्रदेशका मुख्यमन्त्री कृष्ण यादव संघीय सरकारको सहमति नलिई भारत भ्रमणमा गएको विषय सार्वजनिक भएको छ ।
मुख्यमन्त्री यादव भने आफ्नो भ्रमण व्यक्तिगत तथा धार्मिक प्रकृतिको भएकाले संघीय सरकारको सहमति आवश्यक नपरेको बताएका छन् ।
प्रदेश सरकारका गृहमन्त्री फकिरा महतोका अनुसार मुख्यमन्त्री यादव गत शुक्रबार भारतको देवघरस्थित बाबा वैद्यनाथ धाम (बाबाधाम) भ्रमणका लागि भारत गएका हुन् । उनीसँग प्रदेश सरकारका केही मन्त्री र स्वकीय सचिवसमेत रहेको महतोले जानकारी दिए ।
मुख्यमन्त्री यादव भारत भ्रमणका क्रममा धार्मिक तथा सांस्कृतिक कार्यक्रममा सहभागी भएको स्रोतले जनाएको छ । उनी आइतबार राति नै मधेस प्रदेश फर्किएका छन् ।
विदेश भ्रमणका विषयमा प्रदेशका मुख्यमन्त्री तथा मन्त्रीले संघीय सरकारसँग समन्वय र स्वीकृति लिने अभ्यास रहँदै आएको छ ।
यसअघि मधेस प्रदेशका तत्कालीन मुख्यमन्त्री लालबाबु राउत र सतिश सिंहको विदेश भ्रमणका लागि संघीय सरकारबाट स्वीकृति दिइएको निर्णयसमेत सार्वजनिक अभिलेखमा रहेको बताइएको छ ।
यद्यपि, मुख्यमन्त्री यादवको पछिल्लो भ्रमणका सम्बन्धमा संघीय सरकारबाट भारत भ्रमणका लागि कुनै निर्णय नभएको बताइएको छ । यसले प्रदेश सरकार र संघीय सरकारबिचको समन्वय तथा विदेश भ्रमणसम्बन्धी प्रक्रियाबारे प्रश्न उठाएको छ ।
मुख्यमन्त्री यादवले भने आफू सरकारी प्रतिनिधिमण्डलको औपचारिक भ्रमणमा नभई व्यक्तिगत धार्मिक भ्रमणमा गएको स्पष्ट पारे । धार्मिक भ्रमण भएकाले संघीय सरकारसँग सहमति नलिएको उनको भनाइ छ ।
‘व्यक्तिगत धार्मिक भ्रमण भएकाले संघीय सरकारको सहमति लिएको होइन,’ यादवले भने । उनका अनुसार शुक्रबार भारत गएर आइतबार राति नै प्रदेश फर्किएका हुन् ।