काठमाण्डाै, २८ भदाै । भारतको नयाँदिल्लीमा शनिबारदेखि जारी १८औँ ब्रिक्स शिखर सम्मेलनको आज अन्तिम दिन हो । सम्मेलनको अन्तिम दिन खुला बैठक आयोजना हुँदैछ, जसमा ब्रिक्स सदस्य राष्ट्रका नेता तथा आमन्त्रित देशका प्रमुख सहभागी हुनेछन् ।
खुला बैठकमा ब्रिक्ससँग सम्बन्धित विभिन्न महत्त्वपूर्ण विषयमा छलफल हुने कार्यक्रम छ । बैठकपछि भारतीय प्रधानमन्त्री नरेन्द्र मोदीले चार देशका नेतासँग छुट्टाछुट्टै द्विपक्षीय वार्ता गर्नेछन् ।
सम्मेलनको पहिलो दिन भारतले ब्रिक्स राष्ट्रहरूबीच तत्काल साझा मुद्रा निर्माण गर्ने कुनै प्रस्ताव नरहेको स्पष्ट पारेको थियो । यद्यपि सदस्य राष्ट्रबीच स्थानीय मुद्रामा व्यापार तथा भुक्तानी प्रवर्द्धन गर्ने विषयमा छलफल भइरहेको भारतीय विदेश मन्त्रालयले जनाएको छ ।
स्थानीय मुद्रामा कारोबार बढाउने उद्देश्य सदस्य राष्ट्रबीचको व्यापारलाई सहज बनाउनु र लेनदेनको लागत घटाउनु रहेको बताइएको छ।
यसैबीच, सम्मेलनको पहिलो दिन शनिबार ब्रिक्स सदस्य राष्ट्रहरूले ‘नयाँदिल्ली घोषणापत्र’ अनुमोदन गरेका छन् । घोषणापत्रमा रुस, चीनलगायत सदस्य राष्ट्रहरूले भारतको पहलगाममा भएको आतंकवादी हमलाको निन्दा गरेका छन् ।
ब्रिक्स राष्ट्रहरूले आतंकवादीलाई आश्रय दिने तथा सहयोग गर्नेहरूमाथि संयुक्त रूपमा कारबाही गर्ने प्रतिबद्धतासमेत जनाएका छन् ।