सर्लाही, १३ असाेज । अमेरिकी प्रविधि कम्पनी एप्पललाई पेटेन्ट गरिएको प्रविधि प्रयोग गरेको अभियोगमा ५.७ अर्ब डलरभन्दा बढी क्षतिपूर्ति तिर्न आदेश दिइएको छ ।
उक्त प्रविधि एप्पलका उपकरणमा प्रयोग हुने ‘ह्याप्टिक फिडब्याक’ अर्थात् सूचना प्राप्त हुँदा वा कुनै बटन थिच्दा महसुस हुने कम्पनसँग सम्बन्धित छ ।
अमेरिकाको क्यालिफोर्नियास्थित दक्षिणी जिल्ला संघीय अदालतको जुरीले एप्पलले सान डिएगोस्थित प्रविधि कम्पनी ट्याक्सन टेक्नोलोजीको स्वामित्वमा रहेका दुईवटा पेटेन्ट उल्लंघन गरेको ठहर गरेको हो ।
निर्णयपछि ट्याक्सनका वकिल लान्स याङले भने, ‘जुरीले ट्याक्सनको पक्षमा फैसला गर्दै उसको पेटेन्ट अधिकारलाई मान्यता दिएकोमा हामी खुसी छौँ ।’
यो फैसला सन् २०२१ देखि चल्दै आएको कानुनी विवादको पछिल्लो घटनाक्रम हो । ट्याक्सनले त्यतिबेला एप्पलविरुद्ध मुद्दा दायर गरेको थियो ।
सन् २०२३ मा संघीय अदालतका एक न्यायाधीशले एप्पलले ट्याक्सनको पेटेन्ट उल्लंघन नगरेको फैसला गरेका थिए ।
तर, गत वर्ष पुनरावेदन अदालतले उक्त मुद्दालाई पुनः अघि बढाउने बाटो खोलेको थियो ।
ट्याक्सनले सुरुमा दायर गरेको ३१ पृष्ठ लामो उजुरीमा एप्पलले आफ्नो प्रविधिको अनुमति वा अधिकारबिना प्रयोग गरेको आरोप लगाएको थियो ।
कम्पनीले एप्पलले ट्याक्सनको नयाँ सिर्जना र सफलताबाट फाइदा उठाउँदै पेटेन्ट उल्लंघन गर्ने उपकरण बिक्री गरिरहेको दाबी गरेको थियो ।
ट्याक्सनले एप्पललाई आफ्ना पेटेन्टको सम्भावित उल्लंघनबारे जानकारी हुँदाहुँदै पनि त्यसलाई बेवास्ता गरेको आरोपसमेत लगाएको थियो ।
तर, जुरीले एप्पलले जानाजानी पेटेन्ट उल्लंघन गरेको भने ठहर गरेन ।
एप्पलले फैसलाविरुद्ध पुनरावेदन गर्ने जनाएको छ । कम्पनीले आफ्नो ‘ट्याप्टिक इन्जिन’ ट्याक्सनको प्रविधिभन्दा मौलिक रूपमा फरक रहेको दाबी गरेको छ ।
‘एप्पलको ट्याप्टिक इन्जिन ट्याक्सनको प्रविधिभन्दा मौलिक रूपमा फरक छ । परीक्षणका क्रममा ट्याक्सनले आफ्नै परीक्षणमार्फत एप्पलका उत्पादनमा समेत यही कुरा पुष्टि गरेको थियो,’ एप्पलले भनेको छ ।
यो फैसला एप्पलका लागि नेतृत्व परिवर्तनको महत्वपूर्ण समयमा आएको हो । सेप्टेम्बरमा जोन टर्नसले १५ वर्षदेखि कम्पनीको नेतृत्व गर्दै आएका टिम कुकको स्थानमा प्रमुख कार्यकारी अधिकृत (सीईओ)को जिम्मेवारी सम्हालेका थिए ।
क्यालिफोर्नियाको कुपर्टिनोमा मुख्यालय रहेको एप्पल आर्टिफिसियल इन्टेलिजेन्स (एआई) सम्बन्धी उत्पादन तथा सेवा सार्वजनिक गर्ने क्रममा अन्य प्रमुख प्रविधि कम्पनीभन्दा पछाडि परेको अवस्थामा नेतृत्व परिवर्तन भएको हो ।
फैसला सार्वजनिक भएपछि सोमबार एप्पलको शेयर मूल्य पनि घटेको छ । बजार खुलेसँगै कम्पनीको शेयर करिब २ प्रतिशतले ओरालो लागेको थियो ।