सर्लाही, १० बैशाख । सुधन गुरुङले गृहमन्त्रीबाट राजीनमा दिएपछि उनको ठाउँमा को आउँछ भन्ने चर्चा अहिले व्याप्त छ ।
सामाजिक सञ्जालमा विभिन्न नामहरुबारे अड्कलबाजी पनि भइरहेका छन् । यद्यपि, प्रधानमन्त्री बालेन्द्र साहले तत्काल अर्को गृहमन्त्री नबनाउने दाबी स्रोतहरुको छ ।
विवादित व्यवसायी दिपक भट्टसँग व्यापारिक साझेदारी रहेको खुलासापछि दबाबमा परेका गृहमन्त्रीले हिजो राजीनामा दिएका थिए ।
राजीनामा घोषणा गर्दा लेखेको स्टाटसमा उनले आफूमाथि छानबिनका लागि चुनौति दिएका छन् । आज बसेको मन्त्रीपरिषद बैठकले सुधनमाथि उठेका विवादबारे छानबिन गर्न समिति बनाउने चर्चा थियो । तर, सरकारका प्रवक्ता तथा शिक्षामन्त्री सस्मित पोखरेलले सुनाएको तीन बुँदे निर्णयमा यो उल्लेख छैन ।
मन्त्री गुरुङले प्रधानमन्त्री कार्यालयबाटै स्टाटस लेखेर राजीनामा दिएको सार्वजनिक घोषणा गरेका थिए । त्यसपछ उनी गृह मन्त्रालय गए । त्यहाँ उनले करिब ३ घन्टा बिताए । मन्त्रालयमा उनलाई औपचारिक बिदाई गरिएको थियो ।
नेपाल प्रहरी र सशस्त्र प्रहरीका प्रमुखहरु पनि बिदाईका लागि मन्त्रालय आएका थिए । नेपाल प्रहरीका महानिरिक्षक दानबहादुर कार्कीले मायाको चिनो दिएर बिदाइ गर्दा गुरुङ भावुक देखिए ।
बिदाइपछि सरकारी गाडी मन्त्रालयमै छोडेर गुरुङ आफ्नै रातो गाडीमा सिंहदरबारबाट निस्किए । गुरुङले हिजै सरकारी निवास छोडेको उनको सचिवालय स्रोतले बतायो ।
गुरुङ हिजै बेलुका सरकारी निवास छोडेर सितापाइलास्थित आफ्नो अपार्टमेन्टमा सरेको स्रोतको भनाइ छ ।
फेरि फर्किने दाबी
पूर्वगृहमन्त्रीनिकट स्रोतहरु उनी फेरि गृह मन्त्रालयमा फर्किने दाबी गर्छन् । सरकारले गृहमन्त्रीमाथि छानबिन समिति बनाउने र केही दिनमै त्यसले क्लिन चिट दिने उनीहरुको विश्वास छ ।
गुरुङको सचिवालयका एक सदस्यले भने, ‘प्रधानमन्त्रीले गृह मन्त्रालय आफैंसँग राख्नुभएको छ । उहाँले अर्को गृहमन्त्री तत्काल नियुक्त गर्नुहुन्न । सुधन गुरुङ नै केही दिनमा फर्किनुहुने छ ।’
प्रधानमन्त्री निकट स्रोतले भने यसबारे केही पनि बताउन चाहेन । रास्वपाको स्रोतले तत्काल प्रधानमन्त्रीले अर्को गृहमन्त्री नबनाए पनि सुधनले नै कमब्याक गर्ने ग्यारेन्टी भने नरहेको बतायो ।
‘छानबिनबाट निर्दोष भेटिनुभयो भने उहाँ आउन पनि सक्नुहोला । दोषि देखिनुभयो भने त आउने कुरा भएन । अहिले चाहिँ गृहमन्त्री अर्को नबनाइहाल्ने कुरा छ ।’