काठमाडौं, ८ असार । पोर्चुगलका विङ्गर फ्रान्सिस्को कोन्सेइसाओले टोलीका खेलाडीहरूलाई क्रिस्टियानो रोनाल्डोलाई बल पास गर्नैपर्छ भन्ने कुनै दबाब नरहेको बताएका छन् ।
रिपब्लिक गणतन्त्र कङ्गोसँग १–१ को निराशाजनक बराबरीपछि ४१ वर्षीय रोनाल्डोको भूमिकामाथि आलोचना बढिरहेका बेला कोन्सेइसाओले टोलीभित्र यस्तो कुनै बाध्यता नरहेको स्पष्ट पारेका हुन् ।
‘हामीलाई रोनाल्डोलाई नै बल दिनुपर्छ भन्ने आवश्यकता महसुस हुँदैन,’ उनले आइतबार आयोजित पत्रकार सम्मेलनमा भने, ‘म बल त्यही खेलाडीलाई दिन्छु जो उत्कृष्ट स्थितिमा हुन्छ र जसलाई विपक्षीले मार्क गरेका हुँदैनन् ।’
उनले रोनाल्डोलाई टोलीको अन्य सदस्यसरह खेलाडीका रूपमा हेरिने बताए । सामूहिक सफलता हासिल गर्न टोलीका सबै खेलाडीको योगदान आवश्यक हुने उनी बताउँछन् ।
‘क्रिस्टियानो आफ्नो करियर र ४१ वर्षको उमेरमा पनि कायम रहेको भोकका कारण उदाहरणीय खेलाडी हुन्,’ कोन्सेइसाओले भने, ‘उनी नेतृत्व र गोल गर्ने क्षमताका हिसाबले पनि प्रेरणाका स्रोत हुन् । गोल गर्ने मामिलामा उनीजस्तो अर्को कोही छैन । उनी अन्य खेलाडीझैँ टोलीलाई सहयोग गर्न यहाँ छन् ।’
कङ्गोविरुद्धको खेलमा रोनाल्डो प्रभावशाली देखिन सकेनन् । पूरा खेल खेल्दा उनले केवल २५ पटक मात्र बल छोएका थिए, जुन प्रमुख अन्तर्राष्ट्रिय प्रतियोगितामा पोर्चुगलका लागि पूरा खेल खेलेका क्रममा उनको सबैभन्दा कम संख्या हो ।
रोनाल्डोको प्रदर्शनलाई अर्जेन्टिनाका कप्तान लियोनल मेसीसँग तुलना गरिएको छ । ३८ वर्षीय मेसीले एक दिनअघि अल्जेरियाविरुद्ध ह्याट्रिक गर्दै अर्जेन्टिनालाई ३–० को जित दिलाएका थिए ।
समूह ‘के’ मा रहेको पोर्चुगलले अब मंगलबार ह्युस्टनमा उज्बेकिस्तानसँग खेल्नेछ । पहिलो खेलमा अंक गुमाएपछि पोर्चुगललाई प्रतियोगितामा बलियो पुनरागमनका लागि जित आवश्यक छ ।
‘खराब नतिजाको पीडा हामीभन्दा बढी कसैले महसुस गर्दैन,’ कोन्सेइसाओले भने, ‘हामीले आफ्नो काम उत्कृष्ट ढङ्गले गर्न सकेनौँ भन्ने कुरा हामीलाई थाहा छ । यदि नतिजा राम्रो आएन भने दबाब र आलोचना दुवै बढ्छन् । त्यसैले हामी आफ्नो गुणस्तर देखाएर अर्को खेल जित्न चाहन्छौँ ।’
यसैबीच, कङ्गोसँगको बराबरीपछि फ्रान्सका पूर्वस्ट्राइकर थिएरी हेनरीले रोनाल्डोमाथि स्वार्थी भएको आरोप लगाएका थिए ।
‘टोलीले गोल गर्नुपर्छ, व्यक्तिगत रूपमा तिमीले होइन,’ हेनरीले फक्ससँगको कार्यक्रममा भने ।
कङ्गोका मिडफिल्डर न्गालायेल मुकाउले भने रोनाल्डोप्रति सम्मान व्यक्त गरेका छन् । रोनाल्डोलाई रोक्ने विशेष योजना थियो कि भन्ने प्रश्नमा उनले भने, ‘त्यस्तो खास योजना थिएन। उनी पहिलेका जस्ता खेलाडी छैनन् र अहिले उमेर पनि बढिसकेको छ ।’
‘यो उमेरमा उनले पहिलेझैँ मेहनत गर्न सक्दैनन्, तर म उनीप्रति अत्यन्त सम्मान राख्छु,’ मुकाउले थपे ।
पोर्चुगलका प्रशिक्षक रोबर्टो मार्टिनेज पनि आलोचनाको केन्द्रमा परेका छन् । केही विश्लेषकले उनले टोलीका कप्तान रोनाल्डोलाई बेन्चमा राख्न वा खेलकै बीचमा परिवर्तन गर्न हिच्किचाउने गरेको आरोप लगाएका छन् ।
कङ्गोविरुद्धको खेलमा ८३औँ मिनेटमा मिडफिल्डर भिटिन्हालाई बाहिर निकालेर रोनाल्डोलाई मैदानमै राख्ने निर्णयपछि आलोचना चर्किएको थियो ।
पूर्व प्रिमियर लिग स्ट्राइकर क्रिस सटनले बीबीसीसँग भने, ‘मार्टिनेजको त्यो निर्णय लज्जास्पद थियो । उनी रोनाल्डोलाई बाहिर निकाल्न डराइरहेका छन् । यस्तो लाग्छ, टोलीको वास्तविक नियन्त्रण प्रशिक्षकसँग छैन । आजको खेलले रोनाल्डोलाई समयले उछिनिसकेको देखायो ।’
आलोचकहरूको भनाइमा पोर्चुगलसँग विकल्पको अभाव पनि छैन । पेरिस सेन्ट–जर्मेन (पिएसजी)का स्ट्राइकर गोन्कालो रामोस पूर्ण रूपमा तयार विकल्प हुन् र फरवार्डमा प्रभावकारी भूमिका निभाउन सक्षम छन् ।