काठमाडौं, १४ साउन । फिफाले विश्वकप फुटबलका क्रममा देखाएको गलत व्यवहारलाई लिएर अर्जेन्टिनाविरुद्ध अनुशासनात्मक कारबाही सुरु गरेको छ । फकल्याण्ड टापु (माल्भिनास) सम्बन्धी ब्यानर प्रदर्शन गरेको र फाइनलका क्रममा दुई खेलाडीमाथि हातपात गरेको आरोपमा कारबाही थालिएको हो ।
विवादास्पद परिस्थितिबीच फाइनलमा पुगेको अर्जेन्टिना स्पेनसँग १–० ले पराजित हुँदै उपविजेता बनेको थियो । लियोनेल मेस्सीको टोलीले इङ्ल्यान्डमाथि २–१ को पुनरागमन जित निकाल्दै स्पेनसँगको फाइनल भेट पक्का गरेको थियो । खेलको अन्तिम सिट्टी बजेपछि अर्जेन्टिनी खेलाडीहरूले ुलास माल्भिनास सोन अर्जेन्टिनासु लेखिएको ब्यानर प्रदर्शन गरेका थिए, जसको अर्थ ‘फकल्याण्ड टापु अर्जेन्टिनाको हो’ भन्ने हुन्छ ।
खेलका दौरान राजनीतिक सन्देश दिन निषेध गरिएको फिफाको नियम उल्लंघन भएको हुनसक्ने भन्दै फिफाले खेल सकिएलगत्तै अध्ययन सुरु गरेको थियो ।
तनावपूर्ण खेलको दुई हप्तापछि फिफाले अर्जेन्टिनी फुटबल संघविरुद्ध औपचारिक रूपमा अनुशासनको कारबाही प्रक्रिया अघि बढाएको छ ।
फिफाको विज्ञप्तिमा भनिएको छ, ‘फिफा अनुशासन समितिले अर्जेन्टिनी फुटबल संघविरुद्ध फिफा अनुशासन संहिताको धारा १३ (गैर–खेलकुद प्रदर्शनका लागि खेलको प्रयोग), धारा १४ (टोलीको दुर्व्यवहार), धारा १५ (भेदभाव र रंगभेद) र धारा १७ (खेलको सुरक्षा र व्यवस्था) उल्लंघन गरेको आशंकामा कारबाही प्रक्रिया सुरु गरेको छ । यो कारबाही फिफा विश्वकप २०२६ का विभिन्न खेलहरूमा देखिएका भेदभावपूर्ण नारा र इशारा, ढिलो गरी खेल सुरु भएको, सुरक्षा प्रोटोकल पालना नगरेको, अनुपयुक्त सन्देशहरू प्रदर्शन गरिएको र दर्शकहरूले वस्तुहरू फ्याँकेको विषयमा केन्द्रित छ ।’
विश्वकप फाइनलपछि भएको अशोभनीय हर्कतको विषयलाई पनि फिफाले उठाएको छ । स्पेनको जितपछि मेटलाइफ स्टेडियममा देखिएका अप्रिय दृश्यहरूमा लियान्द्रो पारेडेस, नाहुएल मोलिना, थियागो अल्माडा र सहायक प्रशिक्षक रोबर्टो आयला संलग्न देखिएका थिए ।
पारेडेसले स्पेनिस खेलाडी एरिक गार्सियासँग झगडा गर्दै उनको कठालो समातेको देखिएको थियो । सार्वजनिक भएको भिडियो फुटेजमा नाहुएल मोलिनाले जितको खुसीयाली मनाउँदै दौडिरहेका म्यानचेस्टर सिटीका स्टार रोड्रीलाई हिर्काएको देखिएको छ ।
विश्व विजेता स्पेन पनि यस घटनामा पूर्ण रूपमा निर्दोष देखिएको छैन । बार्सिलोनाका मिडफिल्डर गाभीमाथि पनि गलत आचरण देखाएको आरोप लगाइएको छ ।
फिफाको अर्को विज्ञप्तिमा भनिएको छ, ‘फिफा अनुशासन समितिले विश्वकप २०२६ को फाइनल (स्पेन विरुद्ध अर्जेन्टिना) मा भएका घटनाहरूको रिपोर्ट प्राप्त गरेको छ । सोही आधारमा अर्जेन्टिनी खेलाडी नाहुएल मोलिना, लियान्द्रो पारेडेस र सहायक प्रशिक्षक रोबर्टो आयला विरुद्ध हातपात–कुटपिटको आरोपमा कारबाही प्रक्रिया सुरु गरिएको छ । साथै, मोलिना, थियागो अल्माडा र स्पेनिस खेलाडी गाभी विरुद्ध खेलभावना विपरित व्यवहारको आरोपमा पनि कारबाही प्रक्रिया सुरु गरिएको छ ।’
फिफाले आरोपितहरूलाई आफ्नो बचाउ गर्ने मौका दिइने र त्यसपछि अनुशासन समितिले अन्तिम निर्णय गर्ने बताएको छ । फिफाको नियम अनुसार दोषी ठहरिएमा उनीहरूमाथि विश्वव्यापी रूपमा फुटबल खेल्न प्रतिबन्ध लाग्न सक्छ ।
यसअघि, महिला विश्वकप फाइनलपछि खेलाडीलाई ओठमा चुम्बन गरेको भन्दै स्पेनिस फुटबल संघका पूर्वअध्यक्ष लुइस रुबियल्सलाई पनि यही नियम अन्तर्गत प्रतिबन्ध लगाइएको थियो । त्यस्तै, २०१४ को विश्वकपमा जियोर्जियो चिलिनीलाई टोकेको आरोपमा लुइस सुआरेजलाई चार महिनाको प्रतिबन्ध लगाइएको थियो ।
सन् २०१४ मा स्लोभेनियाविरुद्धको मैत्रीपूर्ण खेलअघि यस्तै ब्यानर प्रदर्शन गर्दा अर्जेन्टिनालाई २० हजार पाउण्ड जरिवाना गरिएको थियो । यसपटक इङ्ल्यान्डविरुद्धको खेलपछि ब्यानर बोक्ने क्रिस्टियन रोमेरो, लिजान्ड्रो मार्टिनेज र जियोवानी लो सेल्सोलाई पनि प्रतिबन्ध लाग्न सक्ने सम्भावना छ ।
सन् २०२४ मा युरो कप जितेपछि ‘जिब्राल्टर स्पेनको हो’ भन्दै नारा लगाएका कारण स्पेनका रोड्री र अल्भारो मोराटामाथि पनि एक खेलको प्रतिबन्ध लगाइएको थियो ।