सर्लाही, १४ असार । गृहमन्त्री सुधन गुरुङले तराई मधेशका सीमा क्षेत्रको निरीक्षण गरेका छन् ।
गुरुङ मन्त्रीका रुपमा लावालस्कर लिएर भन्दा पनि सर्वसाधारणको भेषमा सामान्य तरिकाले सीमा क्षेत्रको वस्तुस्थितिबारे जानकारी लिएका थिए ।
उनले सीमा क्षेत्रको वस्तुस्थितिको जानकारी लिँदै सीमामा बसिरहेका स्थानीय बासिन्दासँग त्यहाँ व्यहोर्नुपरेको समस्याबारे पनि छलफल गरेका थिए ।
स्थानीयले सीमा नाकामा सुरक्षाकर्मीबाट दु:ख पाएको गुनासो गरेका थिए ।
सीमा क्षेत्रमा सशस्त्रका डिएसपीदेखि प्रहरी समेतले सिसी क्यामरा हुँदाहुदै पनि पैसा लिएर तस्करी गराउने गरेको गुनासो पनि राखेका थिए ।
गृहमन्त्री गुरुङले आफू स्थलगत बुझ्न आएको भन्दै समस्या समाधान गर्ने प्रतिबद्धता जनाएका थिए । सीमामा तस्करी रोकिनुपर्ने र नागरिकले सहज आवतजावत पाउनुपर्ने पक्षमा आफू रहेको उनको भनाइ थियो ।
गृहमन्त्री सामान्य रुपमा निरीक्षणमा आएर आफूहरुको समस्या सुनेको भन्दै स्थानीयले धन्यवाद पनि दिएका थिए ।