सर्लाही, १३ भदाै । भोटेकोसी बाढी प्रभावित क्षेत्रमा उद्धारका लागि भारतलाई ठूलो क्षमताको हेलिकप्टर ल्याउन गरेको आग्रहलाई प्रधानमन्त्री कार्यालयले अस्वीकार गरेको छ ।
भारतीय उद्धार टोलीले भोटेकोसी बाढीबाट क्षति पुगेका र सयौं मान्छे फसिरहेका चिलिमे, त्रिशूली-३ ‘ए’, माथिल्लो त्रिशूली तथा अरु विद्युत् आयोजनामा उद्धार कार्यमा खटिन ठूलो हेलिकप्टर ल्याउन अनुमति मागेको थियो । तर, सरकारले अनुमति दिन अस्वीकार गरेको छ । रसुवा र नुवाकोटका ११ जलविद्युत आयोजनामा कार्यरत करिब नौ सय जना सम्पर्कविहीन छन् ।
नेपाल विद्युत् प्राधिकरण स्रोतले पनि भारतीय उद्धार टोलीले यी विद्युत् आयोजनामा फसेका कर्मचारी तथा मजदूरको उद्धार गर्न ठूलो क्षमताको हेलिकप्टर नेपाल ल्याउन अनुमति मागेको पुष्टि गरेको छ । तर, उनीहरूले अनुमति नपाएको प्राधिकरण स्रोतले जानकारी दिएको छ ।
संस्कृति, पर्यटन तथा नागरिक उड्डयनमन्त्री खडकराज पौडेलको सचिवालयका एक सदस्यले ठूलो क्षमताका हेलिकप्टर ल्याउन अनुमति नदिइएको पुष्टि गरे। ‘ठूलो हेलिकप्टर ल्याउन अनुमति नदिने भन्ने छ,’ ती सदस्यले भने ।
उनका अनुसार, प्रधानमन्त्री तथा मन्त्रिपरिषद्को कार्यालयले नै विदेशबाट ठूला हेलिकप्टरलाई उद्धारमा ल्याउन अनुमति दिएको छैन ।
प्रधानमन्त्री कार्यालयले नै अनुमति नदिएकाले आफूहरूले पनि सोही बमोजिम भारतीय हेलिकप्टरलाई अनुमति नदिएको उनले जानकारी दिए ।
भौगोलिक हिसाबका कारण सुरक्षित नदेखिएकाले अनुमति दिन नसकिने उनको भनाइ छ । साथै विदेशी पाइलटलाई पहाडी तथा उच्च पहाडी भूभागमा हेलिकप्टर उडाउन दिँदा जोखिम हुन सक्ने भएकाले ठूलो क्षमताको हेलिकप्टर ल्याउन भारतलाई स्वीकृति नदिएको जिकिर गरे ।
‘ठूलो क्षमताको हेलिकप्टर रसुवा, नुवाकोटजस्तो भौगोलिकरूपमा चुनौतीपूर्ण जिल्लाहरूमा उडान उपयुक्त मानिँदैन। त्यसमाथि उद्धारका लागि यस्ता हेलिकप्टर अझ जोखिमपूर्ण हुनसक्छ,’ पर्यटनमन्त्रीको सचिवालयका ती सदस्यले भने, ‘यस्तो कठिन र जटिल भौगोलिक बनावट भएको ठाउँमा यहाँ उडाउने अनुभव नभएका पाइलटलाई ठूलो क्षमताको हेलिकप्टर ल्याउन नदिने सरकारको नीति छ ।’
विद्युत् प्राधिकरणले भने ठूला हेलिकप्टर ल्याएर भए पनि सुरुङमा फसेका कर्मचारी तथा मजदूरको उद्धार छिटो गर्न दबाब दिइरहेको छ। तर, सरकारले भने ठूलो हेलिकप्टर ल्याउन अनुमति दिएको छैन ।
सरकारले अनुमति दिएपछि माथिल्लो त्रिशूली-३ ‘बी’ मा फसेकाहरूको उद्धार गर्न चिनियाँ विज्ञ टोली फिल्डमा खटिसकेको छ। विज्ञसहित ६ जनाको चिनियाँ टोली चिनियाँ हेलिकप्टरमार्फत सोझै त्रिशूली क्षेत्रमा अवतरण गरेको थियो । त्यहाँबाट नेपाली हेलिकप्टरबाट प्रभावित क्षेत्र पुगेको छ ।